તું અને તારી વાતો…

તું અને તારી વાતો
વિચારતાં જાગું આખી રાતો
કેવો ગજબ નો છે આ નાતો
જવાબ શોદ્યે નથી શોધાતો..

ખુલ્લી આંખે જોઉં  સપના
સપનામાં જોઈ તને હરખાતો
પીધા છે જામ તારી ચાહતના
થાક ઉજાગરાનો કેમેય નથી વર્તાતો..

સરોવરથી પણ ઊંડી તારી આંખો
અણકહ્યો પ્રેમ છે એમાં છલકાતો
મુખની મારા રેખાઓ જોઈ
ચહેરો છે તારો મસ્ત મલકાતો..

ફુરસદ મળે અનુભવિજો મનમાં
કિસ્સો તારોમારો કેવો છે ગરમાતો
સ્નેહના સાગરમાં વ્હાલની કસ્તી પર
એકમેકના હૈયે હસીન છે ચિતરાતો..

~ કલ્પતરૂ

Advertisements

સ્વપ્નસુંદરી

image

ઝંખનાઓનો સાપ હૃદયમાં ભીતર દંશ મારે
દિલ પ્રેમરૂપી ઝેરનું મારણ પામવા વલખાં મારે
તડપની આ ખરબચડી સડકની પેલી પારે
સ્વપ્નોની સુંદરી રમતિયાળ નયનો ઉછાળે
સમય આવશે ત્યારે કિસ્મત ના સથવારે
થશું એ સ્વપ્નસુંદરીના અમે પ્રાણદુલારે
આગમનથી જેના જીવન ઉત્સવ બનશે અમારું
રાહ જોતી હશે એ નાર ક્યાંક પોતાને દ્વારે

~ કલ્પતરૂ

જીવ્યા કરીશ…

જીવ્યા કરીશ એ સઘળું અવિરત
એ વાતો એ રાતો એ યાદો હમેશા
પાંપણ પર પાણી ન લાવીશ કદી હું
બસ રડ્યા કરીશ મનોમન હમેશા
મળી છે મને જો તક કોઈ એવી
ખબર તારી પૂછતો રહીશ હમેશા
ભલે તારા કદમો રહી શક્યા ના અડીખમ
આ પાગલ હ્રદય માં રહીશ તુ હમેશા

~ કલ્પતરૂ
16/12/2015

ગમ્મત લાગે છે…

હોઠો પર લાવવી મનની વાત,
બહુ મહેનત માંગે છે
શી ખબર મળશે કે નહીં સંગાથ,
એતો કિસ્મત માથે છે
મારું હૃદય તારા રુદીયામાં રહેવા
આમરણ અનામત માંગે છે
શાણી થઇ તું  પ્રેમ બક્ષીપંચી હોવાનું
સાચું પ્રમાણપત્ર માંગે છે
સાલું, ગમ્મત તો નથી પણ તને
આ ગમ્મત લાગે છે…
મારો પ્રેમ પ્રસ્તાવ પણ તને
એક રમત લાગે છે…

~કલ્પતરૂ

એટલામાં તો….

ક્યારેક એવું પણ બને કે બે વ્યક્તિ વચ્ચે એક અજબનો સંબંધ બંધાઈ રહ્યો હોય છે, એક પ્રેમ પ્રકરણની પૃષ્ઠભૂ તૈયાર થઈ રહી હોય છે… જે આસપાસના લોકો જોતા હોય છે પણ તેની એ બે વ્યક્તિઓને જ જાણ નથી હોતી.. કેવું ગજબ કહેવાય નહિ…
ચારેક વર્ષ પહેલાં ગુજરાત સમાચારની પૂર્તીમા એક કવિતા વાંચી હતી… જેમાં આ જ વાત સુંદર રીતે રજૂ કરી છે કવિ શ્રી જગદીશ વ્યાસજી એ… આ કવિતા મારા મનમાં રમતી જ રહે છે…  કોઈક ને કોઈક કારણસર… એટલે મન થયું કે અહીં share કરું…
તો ચાલો માણીએ….

“એટલામાં તો…. ”

આપણે હજી જાણતા નથી એકબીજાનું નામ
એટલામાં તો આપણા બેની વાત કરે છે ગામ.
જાઉં હું દોરો વ્હોરવા મને ખ્યાલ ન તારો હોય
એજ દુકાને તું પણ આવે વ્હોરવા માટે સોય.
ગામ એવું કે હાલતાં ભેગાં થઈએ ઠામોઠામ
એટલામાં તો આપણા બેની વાત કરે છે ગામ.
એકબીજાનું સાંભળ્યું નથી આપણે એકે વેણ
આપણી વચ્ચે આટલી છે બસ લેણ ગણો કે દેણ.
નેણ મળે ને અમથું હસી પડતાં સામોસામ
એટલામાં તો આપણા બેની વાત કરે છે ગામ.
કાલ સાંજે તો આરતી ટાણે ભીડ જામી’તી બહુ
‘જય અંબે માં, જય અંબે માં’ ધૂન ગાતા’તા સહુ.
ધૂન ગાતાંતા આપણે ‘રાધેશ્યામ હો રાધેશ્યામ’
એટલામાં તો આપણા બેની વાત કરે છે ગામ.

~જગદીશ વ્યાસ

દિવસ રાત જાગતું આ શહેર…

image

દિવસ રાત જાગતું આ શહેર
હર પળ હર ક્ષણે ભાગતું આ શહેર
દિવસ રાત જાગતું આ શહેર
કોઈક ના જીવનમાં ખુશીઓની લહેર
તો કોઈ પર વરસાવતું દુઃખોનું કહેર
દિવસ રાત જાગતું આ શહેર
લાખો લોકોને સમાવતું આ શહેર
હજારો લોકોને ભરખતુંયે આ જ શહેર
દિવસ રાત જાગતું આ શહેર
આશાઓ, સપનાઓ અને મહત્વાકાંક્ષાઓ
જે લઈને આવે એને રાખતું આ શહેર
દિવસ રાત જાગતું આ શહેર

~ કલ્પતરૂ

હું અને તું બન્યા બસ એકબીજાની માટે – SoundCloud

એક સાંજે એક સંગીતની ધુન સાંભળી અને ખબર નહિ ક્યાંથી પ્રેરણા મળી અને મારા હાથમાં પેન લીધી અને કાગળ પર એક ગીત લખાઈ ગયું, ગીતની ધુન રચાઈ ગઈ અને ગીત ગવાઈને સંગીત સાથે રેડી પણ થઈ ગયું…..  બધું અનાયાસે, અકસ્માતે, અચાનકથી જ….
આ રહ્યા એ ગીત ના શબ્દો….

હું બન્યો તારા માટે, તું બની મારા માટે
હું અને તું બન્યા બસ એકબીજાની માટે
મન મારું લાગે નહીં,  તારા વિના ગમે નહીં
મન મારું ભમે પડ્યું તારા ખયાલોની વાંહે
વારે ઘડી ફોન ખણુ ને વ્હોટ્સએપ ચેક કરુ
બાવરો હું થઈ જાઉં તારો મિસકોલ જો ન આવે
હું નથી તારી સાથે તુ નથી મારી સાથે
પણ મનથી આપણે રહીશું એકબીજાની સાથે
હું બન્યો તારા માટે, તું બની મારા માટે
હું અને તું બન્યા બસ એકબીજાની માટે
.

ગીતની લીંક અહીં નીચે આપેલ છે…
જોકે મારો અવાજ સારો નથી… પણ છતાં એક વખત સાંભળી જુઓ
#np on #SoundCloud